चाकण एमआयडीसीतील ड्रीम प्लास्ट कारखान्याला भीषण आग
चाकण एमआयडीसीतील ड्रीम प्लास्ट कारखान्याला भीषण आग
सहा तास आगीवर नियंत्रण मिळविण्यात अपयश
संपूर्ण कारखाना आगीच्या भक्ष्यस्थानी
कोट्यावधी रुपयांचे नुकसान
चाकण :
 |
| चाकण मधील कंपनीला लागलेल्या आगीचे भीषण दृश्य |
चाकण औद्योगिक क्षेत्रातील ड्रीम प्लास्ट इंडिया प्रा.लि. (खराबवाडी, ता.खेड) या प्लास्टिकची खेळणी व वस्तू बनविणाऱ्या कारखान्याला आज (दि.६) भल्या सकाळी सहा वाजनेचे सुमारास भीषण आग लागून कोट्यावधी रुपयांचे नुकसान झाले आहे. दुपारपर्यंत ही आग विझविण्यासाठी सहा अग्निबंब व पाच पाण्याच्या टॅँकरच्या सहाय्याने अग्निशामान दलाचे जवान प्रयत्न करीत होते. या दुर्घटनेत कारखान्याच्या इमारतीसह कच्चा-पक्का माल , यंत्र सामुग्री , कार्यालय, फर्निचर संपूर्णपणे आगीत स्वाहा झाल्याने कोट्यावधी रुपयांचे नुकसान झाले आहे. आगीतील नुकसानीचा हा आकडा कोट्यावधी रुपयांपर्यंत असल्याचे सांगण्यात आले.
आज (दि.६) सकाळी सहा वाजनेचे सुमारास ड्रीम प्लास्ट इंडिया कंपनीच्या मोल्डिंग शॉप मध्ये आग लागल्याचे सुरक्षारक्षक व परिसरातील नागरिकांच्या लक्षात आले. तत्काळ कंपनीचे अधिकारी व मालकांना या बाबतची माहिती देण्यात आली. आगीचा फैलाव व लगतच्या कारखान्यांना होणारा संभाव्य धोका याचे गांभीर्य लक्षात घेऊन घटनास्थळी तासाभरात अग्निशामक दलाचे सुरुवातीला तीन व नंतर तीन असे सहा अग्निबंब आणि पाच पाण्याचे टँकर तातडीने घटनास्थळी पाचारण करण्यात आले होते. मात्र अवघ्या काही वेळात आगीने रौद्र रूप धारण केल्याने संपूर्ण कारखाना आगीने वेढला गेला. अग्निशामक दलाचे पिंपरी-चिंचवड , पुणे महानगर पालिका ,बजाज, महिंद्रा ,व एमआयडीसी यांचे सहा अग्निबंब व ५० अग्निशमन दलाचे जवान आगीवर नियंत्रण मिळवण्यासाठी शर्थीचे प्रयत्न करीत होते. मात्र कंपनीत मोठ्या प्रमाणात असलेल्या प्लास्टिकला लागलेली हि आग आटोक्यात आणण्यात चार तासांहून अधिक वेळ लोटूनही अपयश येत असल्याचे पाहून कंपनीचा समोरील भाग जेसीबी व क्रेनच्या साह्याने अक्षरशः पाडण्यात आला. व आग असलेल्या ठिकाणी फॉम व पाणी यांचा मोठ्या प्रमाणावर मारा करण्यात आला. मात्र पाच तास आगीवर नियंत्रण मिळविण्यात यंत्रणेला यश आले नाही. अग्निशामक दलाच्या जवानांनी कारखान्याचे दरवाजे क्रेन -जेसीबीने तोडून व खिडक्यांच्या काचा दगडांनी फोडून पाण्याचे फवारे कारखान्यात सोडले होते. चाकण पोलीस घटनास्थळावर आगीच्या या तांडवात अन्य लगतच्या कंपन्या वेढल्या जाऊ नयेत यासाठी लक्ष ठेऊन होते . आजूबाजूच्या नागरिकांनी येथे मोठी गर्दी केली होती. या कारखान्या कडे येणाऱ्या रस्त्याचा नेमका अंदाज येत नसल्याने मदत कार्यात अडथळा येत होता .
दुपारी बारा नंतर या आगीवर नियंत्रण मिळविण्यात अग्निशामक दलाच्या जवानां यश आल्यानंतर सर्वानीच सुटकेचा निश्वास सोडला. मात्र धूपनाऱ्या प्लास्टिकच्या धुराचे लोळ उशिरा पर्यंत निघत होते. कारखान्याचा संपूर्ण मोल्डिंग शॉप ,तयार पक्का व कच्चा माल, यंत्रसामुग्री,व कंपनीचे संपूर्ण शेड या दुर्दैवी आगीच्या भक्ष्यस्थानी पडले . सकाळी सात वाजता पहिली पाळी सुरु होण्यापूर्वी हि आग लागली , रात्री कुणीही कामगार कामावर नव्हते त्यामुळे मोठा अनर्थ टाळला असल्याचे चाकण पोलिसांनी सांगितले. आगीचे नेमके कारण मात्र अद्याप स्पष्ट होऊ शकले नाही. राजगुरुनगर सहकारी बँकेचे माजी अध्यक्ष अशोक भुजबळ यांच्या मालकीचे हे कंपनीचे शेड व इमारत असून त्यांनी इटलीच्या ड्रीम प्लास्ट इंडिया प्रा.लि. या कंपनीस भाडेतत्वावर दिली होती. चाकण पोलिसांनी दुपार नंतर घटनास्थळावर पंचनामा सुरु केला असून पुढील तपास सुरु आहे.
----------------------------
अविनाश दुधवडे ,चाकण ९९२२४५७४७५
Avinash Dudhawade ,chakan 9922457475
टिप्पण्या
टिप्पणी पोस्ट करा